فرانسيانىڭ بۇرىنعى پرەزيدەنتى نيكوليا ساركوزي ەۋروپانىڭ قۇردىمعا كەتىپ بارا جاتقانىنا الاڭدايدى. فرانسۋزداردىڭ ەكس-پرەزيدەنتى ن. ساركوزي Mundo گازەتىنىڭ سايتىنا بەرگەن سۇحباتىندا الەمدىك ساياساتتا ەۋرووداق مەملەكەتتەرىنىڭ ناعىز ويىنشى بولا الماي وتىرعانىن ايتتى. ال وعان كىنالى كىم؟

–عاسىرلار بويى الەمدىك وركەنيەتتىڭ كىندىگى ەۋروپا قۇرلىعى سانالىپ كەلدى. ال قازىرگى دامۋ شىعىسقا قاراي ويىسا باستادى. الەمدە 7 ميللياردتان استام ادام تۇراتىن بولسا، ونىڭ 4  ميللياردى ازيا مەملەكەتتەرى اۋماعىندا تۇرادى. ال ەۋروپانى مەكەندەپ جاتقانداردىڭ سانى شامامەن 800 ميلليون ادام عانا. ءبىز الەمدىك دامۋدىڭ  ورتالىعىنا اينالا الماي وتىرمىز. ونىڭ باستى سەبەبى –دەموگرافيالىق ءوسىمنىڭ كۇرت تومەندەۋى،–دەيدى ەكس-پرەزيدەنت نيكوليا ساركوزي.

ەكس-پرەزيدەنتتىڭ ويىنشا، 27 ەلدىڭ باسىن قوسقان «قارت قۇرلىق» ەلدەرىن ازىرگە ءبىرتۇتاس ۇيىم دەپ اتاۋعا كەلمەيدى. برەكزيت  ماسەلەسى مۇنى ناقتى ايقىنداپ بەردى. ءقازىر ەۋرووداقتى بىرىكتىرىپ تۇرعان ءتورت نارسە عانا، ول–شەنگەن ايماعى، ەۋرو، قورعانىس جانە وداق قانا.

نيكوليا ساركوزي سوندىقتان بولاشاق ەۋروپانىڭ قالاي بولماعىن ويلاۋ كەرەك، ول ءۇشىن ەسكى تۇجىرىمدامالاردان باس تارتقان ءجون دەپ سانايدى.

–ءبىزدىڭ ءوز ارمانىمىز بولعانى دۇرىس. ادامدار قايدا بارا جاتقانىن ءبىلۋى كەرەك. ارەكەتسىز وتىرعانىمىزدان قايدا باعىت العانىمىزدى ءقازىر اڭعارۋ قيىن. ەسكى ەۋروپالىق وركەنيەتتەن قالعان جۇرناق ءبىزدىڭ ءالى دە ءوز ارمانىمىز مەن امبيسيامىزدىڭ بارىن دالەلدەپ وتىر. سوندىقتان دا ەۋروپانى ولتىرمەۋىمىز كەرەك. ال ترامپ «امەريكالىق ارمانىن» جۇزەگە اسىرعىسى كەلەدى،  ول ەۋروپانىڭ السىرەگەنىن قالايدى،–دەيدى فرانسيانىڭ ەكس-پرەزيدەنتى نيكوليا ساركوزي.